FrequencyForty

مبارح تركتنا تيتا سوسو.

الحزن عميق. الواحد بس يخسر ست أو جد، بخسر جندي مجهول كان بيدعيلو بالصحة و السعادة بكل صلاة. بكل صلاة النا دعوة زي كانو عيد ميلادنا ٥ مرات باليوم. تيتا كانت تصلي كتير و كنا نضحك ليش بتطول بصلاتها. وين تيتا؟ بتصلي التراويح!  بس ازا كانت بتدعي لكل ولد و كل حفيد و كل محتاج و كل قريب، لشو بدها تستعجل. 

انهزت الدنيا بس راحت، لأنها هي الساعة و الجذور و الأساس. هية أم أمي، و لولا هية، أحنا مش موجودين. 

مشان إحنا مننسى كتير، رح أكتب هون مشان أضل أتزكر، شوية أشياء من ريحة ستي:
١. تيتا كل ما شافتني ابتسمت أكبر إبتسامة و قالت: “أهلين يا فرح عمري”. والله كنت أحس حالي أهم وحدة بالدنيا. 

٢. هية كانت فنانة بالمطبخ، كل طبخة بتعملها مليانة الحب، شو يعني الأكل مليان حب؟ صعب أفسر، بس بدوقو بكل لقمة. بضل مطبخها أزكى مكان لو وين ما رحت و لفيت. و أزكى طبخة هية المقلوبة. مقلوبة سوسو غير شكل. كانت الوحيدة الي تعملي قوانص، لأنو صعب تنضيفهم، كانت تطبخهم مع كتير زيت زيتون و بصل و بهار. 

٣. كان عندها ستايل مميز باللبس، دايما طبقات. طبقة فوق طبقة، و حجاب فوق الراس. ألوان مختلفة و نقشات، بس أهم شي إنو في طبقات. و لو شو ما كان الطقس، شوب أو برد هية جاهزة. 

٤. تيتا ما بتنسى شي، لا اسم و لا رقم ولا حادثة ولاعنوان. تفاصيل و أسماء كانت مطبوعة بمخها. كنا انسميها المحاسب و مرات المحقق. بتتزكر كل شي صار معها ببيت لحم، بتتزكر جارتها ام جورج. بتتزكر الكويت بكل تفاصيلها. بتتزكر إني ضيعت ٥٠ دينار عيدية بال ١٩٩٥. كانت مشية حسابات البيت متل الساعة. 

٥. هديك اليوم كنا بالحديقة المائية، شفت عيلة معها طنجرة مقلوبة، اتزكرت تيتا بس أخدت طنجرة الورق على نهر بولاية أيداهو، شو استحيت يومها، قال شو عيب! و اليوم بقول يا ريتها كانت معي بالحديقة و عاملة طنجرة ورق. 

٦. هية كانت لبيتها و لعيلتها، و هية و جدو دايما مع بعض. ولا مرة اسمعتها شكت من شغل او تعب او شي. دايما بتقول الحمدالله على كل شي. 

٧. كانت تحكيلي ازا بتتحركي و بتشطفي و بتمسحي غبرة بنزل وزنك و بعدين تقليلي ٦ بيضات مع مرتديلا و خبز. 

٨.  من أجمل الكلام إلي إنحكى في نعيها ” الله يرحمها برحمته الواسعة يا حبيبتي . ربنا يخليكم ويطول بعمركم احفادها واهاليهم وجدو ابوعماد. تيتا ام عماد الطيبة الحنونة الخيرة وصاحبة القلب واللسان الحلو والجميل الذي كان لا يتوقف عن الدعاء والرضا والحمد والشكر . رحيلها مؤلم ومحزن جدا لنا جميعا .. يا رب الصبر 😪🤲🤲❤”

٩. أخر مرة زرت تيتا، أنا عملت فنجان القهوة، كانت أول مرة بتخليني عندهم و أنا أصريت. كان هالفنجان متل شكر و ختام لعلاقتنا الجميلة. 

١٠. تيتا من مواليد فلسطين. ولدت قبل الاحتلال. 

حكيتها و هية بالمستشفى، قلتلها يا تيتا أنا عالبسكليت بكندا،رايحة مشوار حولين النهر و فرجيتها المنظر. قالتلي يا ريتني معك و ابتسمت.